ඖෂධ හිඟය සම්බන්ධයෙන් විපක්ෂ නායක සජිත් ප්‍රේමදාස මහතා මූලාශ්‍රය කරගෙන ඉදිරිපත් කළ තොරතුරු පට්ටපල් බොරු යැයි සෞඛ්‍ය හා ජනමාධ්‍ය ඇමැති, වෛද්‍ය නලින්ද ජයතිස්ස මහතා පාර්ලිමේන්තුවේදී පෙරේදා (22) පැවසීය.
ඇමැතිවරයා මේ බව පැවසුවේ විසර්ජන පනත් කෙටුම්පත කාරක සභා විවාදයට එක් වෙමිනි.
එහිදී ඇමැතිවරයා වැඩිදුරටත් මෙසේ ද පැවසුවේය.
“ඖෂධ හිඟය තහවුරු කරමින් විපක්ෂ නායකවරයා ලේඛනයක් ඉදිරිපත් කළා. ඒ ලේඛනය මම ගෙන්වාගෙන බැලුවා. කිසිදු වගකීමක් නැති ලේඛනයක්. කවදා එකක් ද මේ කියලා බැලුවා. නිකම්ම නිකම් ටයිප් කළ ලේඛනයක් තමයි ඔහු ඉදිරිපත් කළේ. මේ ලේඛනය ගැන නිලධාරීන්ට කියලා මම පරීක්ෂා කර බැලුවා. බෙන්සල් බෙන්සවේට් ඇප්ලිකේෂන් මාසෙකට ඕනෑ කරන්නේ 2083යි. අපි ළඟ 22,155ක තොගයක් තිබෙනවා. කෝලිකැල්සිෆෙරෝල් ටැබ්ලට් කැප්සියුල් ෆයු තවුසන්ඩ් අයිඕ මසකට අවශ්‍ය කරන්නේ 33,333යි. 76,800ක් වෛද්‍ය සැපයීම් අංශයේ පමණක් තිබෙනවා. ජාතික මට්ටමේ 178,190ක් තිබෙනවා. ලිඩොක්‍රේන් ටොෆිකරල් ටෙන් පර්සන්ට් 90 තිබූ එක මසකට 450ක් අවශ්‍ය වෙනවා. 6,612ක් අපි ළඟ තිබෙනවා. ටැමොක්සි ෆේන් ටැබ්ලට් ට්වෙන්ටි මිලිග්රෑම් 150,000ක් මසකට අවශ්‍යයි. 627,024 ක් අපි ළඟ තොග තිබෙනවා. ඉතිං අපි ළඟ මේ ඖෂධ හිඟ වෙන්නෙ කොහොමද? ඩෙක්සමෙතසෝන් මාසික අවශ්‍යතාව මිලියන 9ක් වන විට අපි ළඟ මිලියන 62ක් තිබෙනවා. මේවා කළමනාකරණය කරගෙන යනවා. මූලාශ්‍රය සජිත් ප්‍රේමදාස කියලා කීවා. ඒ නිසා තමයි මම ඉදිරිපත් කළේ. මූලාශ්‍රය සජිත් ප්‍රේමදාස කියලා තිබෙන්නේ පට්ටපල් බොරුවක්. අපි ආවොත් නුවර පෙරහර තියන්න දෙන්නෙ නෑ, අපි ආවොත් කඩ පවරා ගන්නවා, අපි ආවොත් අයි.එම්.එෆ්. එකට දුවන්න වෙනවා කියලා කීවා. එහි දිගුවක් විදියට තමයි මේ ඖෂධ හිඟය ඉදිරිපත් කර තිබෙන්නේ. සජිත් ප්‍රේමදාස යම් තැනක මූලාශ්‍රයක් බවට පත්වෙනවා නම් යළි යළිත් එය බොරුවක් බවට ඔප්පු කර තිබෙනවා. අල, ලූනු හිඟයක් ආවොත් පර්මිට් එකක් ඉෂූ කරලා සති දෙකෙන් තුනෙන් ඒවා පිටරටින් ගෙන්න ගන්න පුළුවන්. නමුත් එහෙම ඖෂධ ගෙන්වන්න බෑ. මේක 2024 වසරේ ටෙන්ඩර් නොකිරීමේ ගැටලුවක්. එය අපි ක්‍රමානුකූලව නිවැරදි කරනවා. ඖෂධ 868ක් තිබෙනවා. වෛද්‍ය සැපයීම් අංශය එයින් 464 ක් ප්‍රසම්පාදනය කරනවා. 2024 දෙසැම්බර් මස 31 වැනිදා වන විට රාජ්‍ය ඖෂධ නීතිගත සංස්ථාව ඉන්ඩෙන්ට් ඉෂූ කර තිබුණේ 114කට. මුදල රුපියල් බිලියන 4යි. මේ වසරේ නොවැම්බර් මස 21 වැනිදා ටෙන්ඩර්වලින් 450ක් කෝල් කළා. 2024 නොවැම්බර් මාසය වන විට 328යි ඉෂූ කර තිබුණේ. පසුගිය වසරේ එස්.පී.සී. එක ඖෂධ මිලදී ගැනීම්වලට වියදම් කර තිබුණේ රුපියල් බිලියන 48යි. මේ වන විට රුපියල් බිලියන 110ක් අපි වෙන්කර තිබෙනවා. ඖෂධ ගැටලුව නිරාකරණයට කොතරම් අපි කටයුතු කරනවාද කියලා මෙමඟින් පෙනී යනවා. එරාවුර් මූලික රෝහලේ අවශ්‍ය ඖෂධ 115න් 109ක් තිබුණා. මොනරාගල, බඩල්ගම ප්‍රාදේශීය රෝහලේ අවශ්‍ය ඖෂධ 106න් 101ක් තිබුණා. තණමල්විල ප්‍රාදේශීය රෝහලේ අවශ්‍ය ඖෂධ 204න් 184ක් තිබුණා. ත්‍රිකුණාමලය, නින්දවූර් මූලික රෝහලේ අවශ්‍ය ඖෂධ 410න් 395ක් තිබුණා. සවින්දමුරුතු ප්‍රදේශීය රෝහලේ අවශ්‍ය ඖෂධ 188න් 185ක් තිබුණා. අම්පාර, පදියතලාව රෝහලේ අවශ්‍ය ඖෂධ 159න් 139ක් තිබුණා. පානම ප්‍රාදේශීය රෝහලේ අවශ්‍ය ඖෂධ 196න් 174ක් තිබුණා. වෙනදාට වඩා ඖෂධ ලැබෙනවා කියලා ඒ රෝහල්වල අය දන්නවා. අපට පොඩි කාලයක් දෙන්න. අපි මේ ඖෂධ ගැටලුව නිරාකරණය කරනවා.
කවදාකවත් ඖෂධ 350ක මිල අඩු කර තිබුණේ නෑ. මීට කලින් 2017දී ඖෂධ 48ක මිල අඩු කළා. අඩු කරමින් පසුකාලීනව නැවත මිල වැඩි කළා. ඖෂධ මිල සූත්‍රයක් අපි හඳුන්වාදෙමින් ඖෂධ 350ක මිල අඩු කළා. ජනතාවට එය විශාල සහනයක්. මේ ගැන විපක්ෂයේ කිසිවෙක් කතා කළේ නෑ. කෝ ඇමෙක්සලෝ ඉන්ජෙක්ෂන් එක රුපියල් 1492කට තිබුණේ. එය රුපියල් 1025 දක්වා අඩු වෙනවා. කෙෆොටැක්ෂීන් ඉන්ජෙක්ෂන් එක රුපියල් 506ට තිබූ එක රුපියල් 425 දක්වා අඩු වෙනවා.
ලොරටඩීන් සිරප් එක 513ට තිබූ එක රුපියල් 431ක් දක්වා අඩු වෙනවා. පිළිකා සඳහා භාවිත කරන ටැක්සලින් ඉන්ජෙක්ෂන් එක රුපියල් 42,000ට තිබූ එක රුපියල් 26,332ක් දක්වා අඩු වෙනවා. කාර්මෙසපින්ට ටැබ්ලට් එක රුපියල් 58 තිබූ එක රුපියල් 47 දක්වා අඩු වෙනවා. බ්‍රේන් ඩැමේජ් සඳහා භාවිත කරන නිමඩොෆියුන් අයි.වී. ඉන්ෆියුසින් එක රුපියල් 6350ට තිබූ එක රුපියල් 4100ට අඩු වෙනවා. මෙලෙස ඖෂධ 350ක මිල අඩු වෙනවා. තව මාස කිහිපයකින් තවත් ඖෂධ 250ක මිල අඩු කරනවා. රජයක් විදියට වසරක් ගත වන විට ඉතිහාසයේ වැඩිම ඖෂධ ප්‍රමාණයක මිල අඩු කළ ආණ්ඩුව විදියට ජනතාවට සහන දී තිබෙනවා.”
