පවතින ගෝලීය තත්ත්වයන් සහ විවිධ වෘත්තීය සමිති ක්රියාමාර්ග මධ්යයේ වුවද, රටේ විදුලි සැපයුම කිසිදු බාධාවකින් තොරව පවත්වාගෙන යාමට අවශ්ය පියවර ගෙන ඇති බව ජාතික පද්ධති ක්රියාකාරී සමාගමේ සභාපති ප්රදීප් පෙරේරා මහතා අවධාරණය කරයි.
ජාතික පද්ධති මධ්යස්ථානය (National System Control Centre) මගින් මොහොතින් මොහොත ජාතික විදුලි බල පද්ධතියේ ඉල්ලුම හා සැපයුම සමතුලිත කිරීමට කටයුතු කරන බව ඒ මහතා සඳහන් කළේය.
ලංකා විදුලිබල මණ්ඩලයට අයත් ජල හා තාප බලාගාර මෙන්ම පෞද්ගලික අංශයේ බලාගාර ද වෙනදා මෙන් සාමාන්ය පරිදි ක්රියාත්මක වන බැවින්, විදුලි උත්පාදනය සම්බන්ධයෙන් මහජනතාව අනියත බියක් ඇති කරගත යුතු නැති බව සභාපතිවරයා වැඩිදුරටත් පැවසීය.
මැදපෙරදිග කලාපයේ පවතින නොසන්සුන්කාරී තත්ත්වය හමුවේ වුවද, විදුලි උත්පාදනයට අවශ්ය ඉන්ධනවල කිසිදු අඩුවක් දැනට නොමැති බව සභාපතිවරයා තහවුරු කළේය.
මේ සම්බන්ධයෙන් ලංකා ඛනිජ තෙල් නීතිගත සංස්ථාව සමග සාකච්ඡා කර ඇති අතර, අවශ්ය තෙල් ලබාදීමට ඔවුන් එකඟතාව පළ කර ඇත.
ගල් අඟුරු බලාගාරයේ සුළු ගැටලුවක් පැවතියද, එය සමස්ත පද්ධතියට බාධාවක් නොවන පරිදි කළමනාකරණය කරන බව ඔහු සඳහන් කළේය.
පවතින වෘත්තීය සමිති ක්රියාමාර්ග හේතුවෙන් ජාතික පද්ධති ක්රියාකාරී සමාගමේ කටයුතුවලට මෙතෙක් කිසිදු බාධාවක් එල්ල වී නොමැති බවත්, පද්ධති මෙහෙයුම් මධ්යස්ථානයේ කටයුතු ඉතා සුහදව සහ ක්රමවත්ව සිදුවන බවත් පෙරේරා මහතා පැවසීය.
ගෝලීය තත්ත්වයන් මත අනාගතය පිළිබඳ ස්ථිරවම පැවසිය නොහැකි වුවද, දැනට පවතින තත්ත්වය අනුව විදුලි සැපයුම ස්ථාවරව පවත්වාගෙන යන බව සභාපතිවරයා වැඩිදුරටත් සහතික කළේය
