අලුතින් ප්රතිසංස්කරණය කරන ලද කොළඹ මධ්යම බස් නැවතුම්පොළේ බුලත් විට කෙළ ගැසීම සඳහා ස්ථානයක් නොමැති බවත් පොදු පහසුකම් සැකසීමේ දී රටේ සංස්කෘතික භාවිතයන් පිළිබිඹු කරන බවට රජය සහතික කළ යුතු බවත් ශ්රී ලංකා පොදුජන පෙරමුණේ සාමාජික නිශාන්ත ඩයස් පවසයි.
බස් නැවතුම්පොළ මෑතකදී ප්රතිසංස්කරණය කර නැවත විවෘත කළද, බුලත් විට කන පුද්ගලයන් සඳහා බලධාරීන් විධිවිධාන සළකා බලා නොමැති බව ඩයස් පැවසීය.
“බස් නැවතුම්පොළ තීන්ත ආලේප කර උත්සවශ්රීයෙන් විවෘත කළා. නමුත් සවස් වන විට එහි පැමිණෙන සියලුම ජනතාවට අවශ්ය පහසුකම් ඔවුන් සපයා තිබුණ ද ?” ඔහු පැවසීය.
බුලත් විට කෑමෙන් පසු කෙළ ගැසීම ශ්රී ලංකාවේ දිගුකාලීන සංස්කෘතික පුරුද්දක් ලෙස පවතින බව සඳහන් කළ ඔහු, ඒ සඳහා පහසුකම් සැලසීමට මෙය සැලසුම් කිරීමේදී අවධානය යොමු නොකළේ මන්දැයි ප්රශ්න කළේය.
නිසි පහසුකම් නොමැතිකමට වඩා බස් නැවතුම්පොළේ බුලත් විට පැල්ලම් පැවතීම කෙරෙහි මහජන සාකච්ඡාව අවධානය යොමු කර ඇති බව ද ඩයස් පැවසීය.
“මේ රටේ සංස්කෘතියක් තියෙනවා. බුලත් විටක් හපලා බිම හෝ මුල්ලකට කෙළ ගැසීම අපේ සංස්කෘතියේ කොටසක් ලෙස බොහෝ කලක සිට පැවත එන ක්රියාකාරකමක්. කාලයත් සමඟ මිනිසුන් වෙනස් විය යුතු බව සත්යයක්, නමුත් හදිසියේම කරන්න බැහැ,” ඔහු පැවසීය.
විශේෂයෙන් ග්රාමීය ප්රදේශවල සිට නාගරික මධ්යස්ථාන කරා ගමන් කරන ජනතාවට ප්රමාණවත් පහසුකම් සැපයිය යුතු බව ඔහු තවදුරටත් පැවසීය.
