ශ්රී ලංකා පොදුජන පෙරමුණේ පාර්ලිමේන්තු මන්ත්රී නාමල් රාජපක්ෂ මහතාගේ නීති උපාධියේ සැක සහිත තැන් ගණනාවක් සම්බන්ධයෙන් වෙබ් අඩවි ගණනාවක වාර්තා කර ඇති බැවින් පාර්ලිමේන්තුවේ ගෞරවය ආරක්ෂා කිරීමට මේ සම්බන්ධයෙන් පැහැදිලි කිරීමක් කරනු ඇතැයි අපේක්ෂා කරන බව ආණ්ඩු පක්ෂයේ ප්රධාන සංවිධායක, සෞඛ්ය හා ජනමාධ්ය අමාත්ය නලින්ද ජයතිස්ස මහතා පාර්ලිමේන්තුවේදී ඊයේ (19) ප්රකාශ කළේය.
නාමල් රාජපක්ෂ මහතාගේ උපාධි සහතිකය 2009 වසරේ සැප්තැම්බර් 15 වැනිදා නිකුත් කර ඇති බවත් ඒ මහතා නීති උපාධිය ලබා ගෙන ඇති සිටි යුනිවර්සිටි ඔෆ් ලන්ඩන් නම් ආයතනය ශ්රී ලංකා නීති විද්යාලයේ ලියාපදිංචිය ලබා ඇත්තේ එම වසරේ ඔක්තෝබර් 15 වැනිදා බවත් අමාත්යවරයා පැවසීය.
අදාළ උපාධි සහතිකය නාමල් රාජපක්ෂ මහතා විසින් ශාස්ත්රපති උපාධිය සඳහා ලියාපදිංචි වීම වෙනුවෙන් ශ්රී ජයවර්ධනපුර විශ්වවිද්යාලයට දී ඇති බවත් එම විශ්වවිද්යාලයේ උපකුලපතිවරයා විශ්වවිද්යාලයෙන් ඉල්ලා අස්වී ඇති අතර ඉල්ලා අස්වීමෙන් දින 54කට පසුව අදාළ උපාධි සහතිකයට අත්සන් කර ඇති බව ද අදාළ වෙබ් අඩවි වාර්තාකර ඇති බව ද අමාත්යවරයා පැවසීය.
ගවේෂණාත්මක මාධ්යවේදිනියක වන නිර්මලා කන්නන්ගර විසින් සිදු කරන ලද හෙළිදරව්වකට අනුව මෙය වාර්තා කර ඇති බවත් නාමල් රාජපක්ෂ මහතාගේ නීති උපාධිය සම්බන්ධයෙන් සැක මුසු තැන් ගණනාවක් මතු වන බව ද හෙතෙම පැවසීය.
එබැවින් පාර්ලිමේන්තුවේ හා මන්ත්රීවරුන්ගේ ගෞරවය ආරක්ෂා කිරීමට මේ පිළිබඳව පැහැදිලි කිරීමක් සිදු කරන ලෙස නාමල් රාජපක්ෂ මහතාගෙන් ඉල්ලා සිටින බව ද අමාත්ය නලින්ද ජයතිස්ස මහතා පැවසීය.
වැඩිදුරටත් අදහස් දැක්වූ අමාත්ය නලින්ද ජයතිස්ස මහතා මෙසේ ද පැවසීය.
“ මෙතන නීතිඥවරු ගොඩක් ඉන්නවා, ඒ අය දන්නවා ශ්රී ලංකා නීති විද්යාලයට ඇතුළු වීමට ලෝ එන්ට්රන්ස් විභාගයක් නැතිව ඇතුළු වීමට ලෝකයේ පිළිගත් නීති උපාධි ලබා දෙන ආයතනවලින් තමයි ඒ අයට අවස්ථාව තිබෙන්නේ.
නමුත් මේ සිටි යුනිවර්සිටි ඔෆ් ලන්ඩන් මේක යුනිවර්සිටි ඔෆ් ලන්ඩන් නෙවෙයි . සිටි යුනිවර්සිටි ඔෆ් ලන්ඩන් කියන ආයතනය ශ්රී ලංකා නීති විද්යාලයේ ලියාපදිංචි වී තිබෙන්නේ 2009-10-15 වැනිදා. නමුත් මේ ආයතනයෙන් උපාධිය ගත්තායැයි කියන නාමල් රාජපක්ෂ මහතා ශ්රී ලංකා නීති විද්යාලයට ඇතුළු වීමට ඉල්ලා තිබෙන්නේ 2009 -09-25 වැනිදා. අයදුම්පත දාපු දවසේම ඒක නීති විද්යාලය භාර අරන් තිබෙනවා. 2009 සැප්තැම්බර් 25 වැනිදා අයදුම්පත භාරගන්න කොට නීති විද්යාලයට ඇතුළු වීමට මේ කියන සිටි යුනිවර්සිටි ඔෆ් ලන්ඩන් ආයතනය ශ්රී ලංකා නීති විද්යාලයේ පිළිගෙන නැහැ.එය පිළිගෙන තිබෙන්නේ ඔක්තොම්බර් 15දා. මේ ගැනත් මෙම වාර්තාවල අවධානය යොමුකර තිබෙනවා.
ඔහුම සඳහන් කරන ආකාරයට, බැචලර් ඔෆ් ලෝයර් හොනර්ස් ක්ලාස් ත්රී උපාධියක්. තුන්වැනි පන්තියේ උපාධියක්. ඒ මට්ටමේ ක්ලාස් ත්රී උපාධියක් අරගෙන එක්සත් රාජධානීයේ නීතිඥ මණ්ඩලවලට ඇතුළු වෙන්නට බැහැ කියන කාරණයත් වාර්තා වී තිබෙනවා. මේ තිබෙන වාර්තා නාමල්ගේ උපාධිය පිළිබඳ වාර්තා ලේඛන සියල්ල සභාගත කරනවා.
